तीजका तीन गज़ल
----------------------------
(१)
कोमल गज़ल
****************
सखारै तिमी आउनु है चेली तीजको दिनैमा
माइतीको आँगन पार उजेली तीजको दिनैमा
हँसाई दिनु रोएको मनलाई नाचेर छमछमी
सजाउनु फूल बेली चमेली तीजको दिनैमा
प्रकृति देवी हुनेछिन मक्ख तिमीलाई पाएर
रमाउलान सारा साथी सहेली तीजको दिनैमा
हराउला कालो औंशीको रात्री चन्द्रमा देखेर
झुल्किदेऊ अब छिट्टै जुनेली तीजको दिनैमा
घनकाइदेऊ मिठो स्वरले सबै पाखा र पखेरो
संगीत मिठो देलान बयेली तीजको दिनैमा
मुटुको टुक्रा आँखाको नानी तिमी हौ जुहार
नठान्नु कहिल्यै आफू अकेली तीजको दिनैमा
कोमल भट्ट
पुरानो नैकाप,काठमाडौँ
हाल:-न्युयोर्क,अमेरिका
२)
कोमल गज़ल
************
रोएको होला माइतिको आँगन के जानु तीजैमा
आँसुले टन्नै भरिन्छन नयन के जानु तीजैमा
परदेशी भए बाबा र आमा शून्य भो चाहाड
सहनै पर्यो दैवको खटन के जानु तीजैमा
ओइलेका होलान जाही र जूही फुल्न नै बिर्सेर
सन्नाटा देख्दा छुट्नेछ रोदन के जानु तीजैमा
रमाउँदै होलान सँगिनी आफ्ना छम छमी नाचेर
सक्दैनन् गर्न पीडाको मापन के जानु तीजैमा
सम्झना हुन्छ स्वर्ग झैं संसार मायाले भरेको
रोकिन खोज्छ मुटुको धड्कन के जानु तीजैमा
कोमल भट्ट
पुरानो नैकाप,काठमाडौँ
हाल:-न्युयोर्क,अमेरिका
(३)
कोमल गज़ल
**************
तीजको रहर पनि गयो बरिलै
खुसीको लहर पनि गयो बरिलै
दु:ख सुख सबैमा घुम्छ फन्फनी
कैयौंको कहर पनि गयो बरिलै
रङ्गी चंगी झल्केका सबै निख्रिए
मस्तीको शहर पनि गयो बरिलै
तड्पे होलान कति त तीखा बाणले
आँसुको जहर पनि गयो बरिलै
कोही हाँसे मनग्यै कोही रोइरहे
भाग्यको ठहर पनि गयो बरिलै
बाटो लाग्यो चाहाड बर्ष दिनैको
आनन्दी पहर पनि गयो बरिलै
कोमल भट्ट
पुरानो नैकाप,काठमाडौँ
हाल:-न्युयोर्क,अमेरिका
No comments :
Post a Comment