कोमल भट्टका तीन गज़ल --------------------------
१)कोमल गज़ल
***********
यसपाली त पक्कै पनि बन्ला संविधान
संसारमा नेपालीको होला पहिचान
गणतन्त्र आउँदा गयो ज्यान धेरैको
सम्झिन्छन् कि शहिदको सच्चा बलिदान ?
विगतमा बदनाम भो नामै देशको
ल्याउनु पर्छ फिर्ता अब मान सम्मान
कति सुन्नु कालो कर्तुत नेताहरूको
अब देखि हुन्न कि त कुर्सि तानातान ?
हाम्रा होइन राम्रा मान्छे छानौं रोजेर
बहिष्कारले गुम्न सक्छ नेपालीको शान
हराएको आशा फेरि खोजौँ एकचोटी
घरै पिच्छे सुशान्तिको आउँछ कि बिहान ?
कोमल भट्ट
पुरानो नैकाप,काठमाडौँ
हाल:- न्युयोर्क,अमेरिका
मुङ्गसिर ४,२०७०
२)
कोमल गज़ल
-------------
बारम्बारै बन्द पार्दा रोएको छ देश आज
निरपराध मान्छे मार्दा रोएको छ देश आज
किन दिन्छन् निमुखालाई शासना यी नेताहरु
नेपालीले आँसु झार्दा रोएको छ देश आज
छैन यहाँ नैतिकता र इमान्दारी कसै सँग
समझदारी सधैँ टार्दा रोएको छ देश आज
आफू बन्न पाए पुग्यो भन्छन् यहाँ धेरै जना
जनताका इच्छा हार्दा रोएको छ देश आज
गरी खान पाउनु पर्ने अधिकार हो नागरिकको
सबको हकमा बार बार्दा रोएको छ देश आज
कोमल भट्ट
पुरानो नैकाप,काठमाडौँ
हाल:- न्युयोर्क,अमेरिका
३)
आदरणीय पोस्टराज सरको नयाँ छन्द "चोयु"मा आधारित :-
कोमल गज़ल
***************
उराठ लाग्दो शहरले सताउँछ
घुरेर भोका नजरले सताउँछ
भुलेर बाटो म त फसें बिरानमा
भएर ब्यर्थै सफ़रले सताउँछ
न मान पाएँ नत भयो सुनाम नै
गुमेर सारा कदरले सताउँछ
गरेछु कामै अगतिलो हुँदा हुँदै
गढेर यस्को असरले सताउँछ
दिएर पिडा नियतिले ठगे सधैं
दुखेर चारै पहरले सताउँछ
म देश खोज्दै फकिर झैं भएँ यहाँ
निराश पार्दै सगरले सताउँछ
छन्द - चोयु
(५ अक्षरमा विश्राम )
ज त स ज गु
कोमल भट्ट
पुरानो नैकाप -७,काठमाडौँ
हाल:- रोचेस्टर,न्युयोर्क
