683.कोमल भट्टका २ गज़ल

कोमल भट्टका २ गज़ल
----------------------

१)
कोमल गज़ल
********
जिन्दगानी कहिल्यै पनि,नटुङ्गिने यात्रा रैछ
सधैँ घुम्छन् दु:ख सुख,नरित्तिने यात्रा रैछ

आनन्द र हाँसो बिना,रोएको छ डाँको छोड्दै
अनन्त यो पीर व्यथा,नछोपिने यात्रा रैछ

अस्तव्यस्त पारेकाछन्,समस्याले घेर्दै घेर्दै
जति मरिमेट्दा पनि,नसुध्रिने यात्रा रैछ

छुट्टिएर सहयात्री लागे,आफ्नै गन्तव्यमा
कहाँ कहाँ पुगे होलान्,नभेटिने यात्रा रैछ

बोक्नु पर्ने गह्रौं भारी,ठाउँ छैन बिसाउनलाई
लगातारै दौडेको छ,नरोकिने यात्रा रैछ

एकादेशकै कथा भए,पुराना ती आत्मीयता
बिर्सी सके "कोमल" मन,नसम्झिने यात्रा रैछ

कोमल भट्ट
पुरानो नैकाप,काठमाडौँ
हाल:-न्युयोर्क,अमेरिका
------------------------
२)
(आदरणीय पोस्टराज सरको छन्द
"पान्पोचे" मा आधारित )
कोमल गज़ल
----------------
रगत हुन्छ रातै,दलित कोही छैन
जनम देखि याहाँ,पतित कोही छैन

गर विचार ठूलो,नियत राखी साफ
सकल प्राण एकै,कथित कोही छैन

नभन माथि तल्लो,कपट छोडी देऊ
बचपनै नबित्दै,पठित कोही छैन

विगत बिर्सिएरै अब त माया राखौँ
नजर आज फेरौँ,अहित कोही छैन

फरक वर्ण भन्दै,नगर हेँला फेरि
बुझ,मनुष्य आफैँ रचित कोही छैन

७ अक्षरमा विश्राम
छन्द:- पान्पोचे

कोमल भट्ट
पुरानो नैकाप काठमाडौँ
हाल:- न्युयोर्क,अमेरिका