 |
| सौरभ कार्की |
उजाड मनमा सिचाई गर्ने नहर कहाँ छ ?
नसोध भो सुनाउने मीठो खबर कहाँ छ ?
पूर्व पश्चिम तिम्लाई भेट्न दौडिरहे सधै
तर तिमी लुक्ने छुट्टै सहर कहाँ छ ?
तिमी नै हौ प्राप्ति मेरो त्याग र तपस्या
टुक्रिएको मुटुमा बाँकी रहर कहाँ छ ?
विहान होस या दिन साँझ रातको त्यो कुरा
यादमा तिम्रै नतड्पेको प्रहर कहाँ छ ?
तिम्रै नाममा मर्न खोज्ने संसारमै कति कति
म खोज्दैछु म उभिएको लहर कहाँ छ ?
तिमी पारि तरेपछि पुल भत्क्यो अरे
अव तिम्लाई भेट्न आउने डहर कहाँ छ ?
तिमी विनै बाँच भन्छौ हाँस पनि भन्छौ
मर्नलाई पिउनैपर्ने जहर कहाँ छ ?
गजलको नि लय हुन्छ छन्द हुन्छ भन्छन्
खोज खोज यै गजलमा बहर कहाँ छ ?
सौरभ कार्की
झुले–४, दोलखा
No comments :
Post a Comment