550.कोमल भट्टका गजलहरु

गज़ल
सोझासिधा निमुखाको आश टुट्नु हुन्न
थिचिएर निसासिंदै सास टुट्नु हुन्न

संसारमा प्यारो हुन्छ आफ्नो घर वार
अनाथ र अशक्तको बास टुट्नु हुन्न

सानालाई नि हुनै पर्छ बाँच्ने अधिकार
भोका नाङ्गा गरीवको गाँस टुट्नु हुन्न

हेरविचारको खाँचो पर्छ उमेर ढल्के पछि
बुढ्यौलीमा सन्ततिको पास टुट्नु हुन्न

अधर्म र असत्यको बाटो हिड्ने लाई
ठूलो पाप लाग्छ भन्ने त्रास टुट्नु हुन्न

कोमल भट्ट
पुरानो नैकाप,काठमाडौँ
हाल:-न्युयोर्क,अमेरिका
==============================
"दु:खै दु:ख मान्दामान्दै गयो जिन्दगानी
***********
दु:खै दु:ख मान्दामान्दै गयो जिन्दगानी
घिच्याएर तान्दातान्दै गयो जिन्दगानी

दिल खोली खुसीबाँड्न सकिएन कहिल्यै
सधैँ मुठी बान्दाबान्दै गयो जिन्दगानी

हेरी ल्याउँदा कोही छैन पराई झैँ लाग्ने
सबै आफ्नू ठान्दाठान्दै गयो जिन्दगानी

धेरैजना"मुखमा राम राम बगलीमा छुरा"
सहीमान्छे छान्दाछान्दै गयो जिन्दगानी

समाधान गर्न गाह्रो समस्याको जालो
जबरदस्ती धान्दाधान्दै गयो जिन्दगानी

कोमल भट्ट
पुरानो नैकाप,काठमाडौँ
हाल:न्युयोर्क,अमेरिका
=========================
आजभोलि यस्तोलाग्छ,झुकेको छ देश मेरो l
परदेशीको दिलमा पनि ,दुखेको छ देश मेरो l

हाम्रो गौरव गाथा के हो? धेरै लाई थाहै छैन l
सगरमाथा हाम्रो आफ्नै,लुकेको छ देश मेरो l

छिमेकीछन् झलमल्ल,हाम्लाई अँध्यारोमा l
बगेकाछन् कोशी काली,सुकेको छ देश मेरो l

चोरबस्छन चौतारीमा,सज्जन पाउँछ शूली l
असक्त र निमुखालाई ,भुकेको छ देश मेरो l

कोहि पुगे चन्द्रमामा ,कोहि मंगल धाउँछन् l
सधैं भरि कुर्सी पाउन , ढुकेको छ देश मेरो l

-----कोमल भट्ट ,न्युयोर्क
8 October ,2012